ऋग्वेदीया ऐतरेयोपनिषत्
अथ तृतीयः खण्डः
स ईक्षत इमे नु लोकाश्च लोकपालाश्च अन्नमेभ्यः सृजा इति ॥१॥
सः एवम् ईश्वरः ईक्षत । कथम् ? इमे नु लोकाश्च लोकपालाश्च मया सृष्टाः, अशनायापिपासाभ्यां च संयोजिताः । अतो नैषां स्थितिः अन्नमन्तरेण । तस्मात् अन्नम् एभ्यः लोकपालेभ्यः सृजै सृजे इति । एवं हि लोके ईश्वराणामनुग्रहे निग्रहे च स्वातन्त्र्यं दृष्टं स्वेषु । तद्वत् महेश्वरस्यापि सर्वेश्वरत्वात् सर्वान्प्रति निग्रहे अनुग्रहे च स्वातन्त्र्यमेव ॥१॥
